股市大上大落如坐过山车，多少都激活咗市面气氛，发展商更趁势出货。但长实在黄竹坑的Blue Coast II 依然要蚀住卖，可见楼市仍未乐观，特别是商业楼宇及铺位。

下载Yahoo财经APP

美股外币即时报价 多国新闻任睇

踏入第四季，银行对债仔似乎已失去耐性，特别以商业楼做抵押嘅债仔。以往香港地产在惊涛骇浪之时都有唔少太子爷触礁，通常老豆都会出手去救仔。不过今次香港地产面对嘅係结构性而非周期性冲击，市场传闻现时最少有两名富二代排紧队破产，事关老豆自己亦係泥菩萨被银行call 孖展。

其中一名富二代，父母都总算是白手兴家，过去廿年食住自由行呢条水，生意自动涌入佢门口发过猪头，继而晋身为社会名流。佢嘅第二代读饱番书后，撞正香港地产市场好似唔识跌咁，屋企有水喉射住之下跟书友仔夹份搞砖头基金，专门投资商业房地产，今日嘅香港地产市度如斯境况，自然要垫尸底。有啲口痕濶佬认为，由得个仔破产唔好出手救对佢实在最有裨益！ 原来背后有另一番盘算。

举个真实个案，有位公子哥儿97年左右做生意搞到破产，祖藉潮洲嘅老豆果然「潮洲音乐」，当时有钱都唔出手相救，由得佢破产。此公子败走去星加坡，踎咗四年等破产令过后，返嚟香港又一条好汉！但佢连老婆同仔嘅赡养费都唔孭，搞到做艺人出身嘅老婆要再出山搵钱养家同仔交学费。

其实老豆肯铁石心肠都係帮个仔谂多一步，呢个老豆过身后留番份身家俾佢，包括一个半山3,000呎物业，起码有瓦遮头先，离婚之后现时仲有第二春。若果当时救佢，分分钟份身家都输埋。所以呢个老豆实在帮个仔谂埋下半生。